Saltar ao contido principal
Xornal

O galego na cultura e no pensamento do mundo da lusofonía, a debate do 25 ao 28 de xuño nun curso de verán da USC en Rianxo

Actualizada: 06-06-2019 09:32
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

‘ Galego, porta aberta para o mundo 2: Lingua, pensamento e cultura na Galiza e Portugal’ é o título do curso da Universidade de Verán da USC que se desenvolverá do 25 ao 28 de xuño no auditorio de Rianxo. Este curso, estruturado en 32 horas lectivas e dirixido por Teresa Moure, conta con financiamento da Secretaría Xeral de Política Lingüística da Xunta de Galicia, da Academia Galega da Língua Portuguesa, da Associaçom Galega da Língua, da Deputación da Coruña e do Concello de Rianxo.

 

Os obxectivos deste programa de formación e divulgación da importante pegada da lingua e da cultura galega pasan por analizar (e vigorizar) os contactos interculturais xa vixentes entre Galicia e Portugal, a partir da noción de lusofonía, un concepto que favorece o contacto cultural e o desenvolvemento socioeconómico das dúas comunidades.

 

Fortalecer a relación entre galego e portugués e desenvolver a Lei Paz Andrade, destinada a introducir o portugués na educación e nos medios de comunicación, son outros dos cometidos que pretende este curso da Universidade de Verán da USC, que non conta con límite de prazas.

 

As persoas interesadas en participar como alumnos neste foro poden formalizar xa a súa inscrición na web da USC, onde tamén poden consultar o programa do curso. O prazo de matrícula permanece aberto ata o venres 14 de xuño