Saltar ao contido principal
Xornal

Crean novos sensores para a detección e o estudo da evolución tumoral

Unha colaboración entre tres centros de investigación de USC e UDC ofrece como resultado a creación de novos sensores que replican os mecanismos de supervivencia das células tumorais

CiMUS Actualizada: 07-06-2019 13:00 . INVESTIGACIÓN
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Imaxe dos novos biosensores activándose ao detectar unha baixa concentración de osíxeno en células (esquerda) e en modelos preclínicos da enfermidade (dereita) /. CiMUS.

Se a poboación dunha pequena cidade medrase de xeito rápido e desproporcionado, a consecuencia natural sería que os servizos básicos (como a auga, o saneamento ou mesmo os alimentos dispoñibles) non alcanzarían a cubrir as necesidades de tódolos seus habitantes.

Algo semellante ocorre cando as células tumorais penetran un tecido: a seu indesexada presenza provoca un incremento substancial no consumo de nutrientes e osíxeno, o que fai inabarcable a subministración desde os vasos sanguíneos a toda a poboación de células asentadas no tecido invadido. Malia todo, as células tumorais conseguen sobrevivir aproveitando certos mecanismos dos que dispón o organismo, grazas aos cales poden aumentar o número de vasos e obter así os nutrientes e o osíxeno que precisan.

A nivel científico-clínico, a posibilidade de detectar a activación destes mecanismos é de gran relevancia, xa que o seu coñecemento permite valorar o grao de agresividade dun determinado tumor. Nun estudo recente publicado na revista Scientific Reports, que edita o grupo ‘Nature’, un equipo integrado por científicos dos centros de investigación galegos CICA (Universidade da Coruña ), CiMUS e CiQUS (Universidade de Santiago de Compostela) conseguiu desenvolver sensores que reproducen o mecanismo que activan as células tumorais cando detectan baixos niveis de osíxeno.

Ou o que é o mesmo: os científicos forno quen de crear unha réplica do seu modus operandi á hora de inducir a formación de novos vasos sanguíneos, imprescindibles para a chegada de máis nutrientes e osíxeno ao tecido.

Os novos sensores están dotados da capacidade para activarse e emitir luz (é dicir, para «acenderse»), o que segundo os investigadores facilita «non só a detección do tumor, senón tamén estudar o seu comportamento».