Saltar ao contido principal
Xornal

Unha xornada analizará casos de boas prácticas no desenvolvemento de proxectos de Aprendizaxe-Servizo na USC

O luns 24 na Facultade de Filosofía

Actualizada: 24-06-2019 12:24
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Cartel do encontro

Un seminario aborda este luns 24 casos de boas prácticas na USC respecto da implantación de proxectos de aprendizaxe-servizo (ApS) e en relación á empregabilidade. É unha acción dirixida a docentes que lideran diferentes proxectos de ApS na USC así como a diferentes entidades da contorna. O fin desta iniciativa é establecer un espazo no que se poidan presentar as diferentes propostas de ApS actualmente en marcha para reflexionar sobre novas vías de traballo e continuar formulando proxectos de calidade. Na sesión da tarde, desenvolverase un espazo vinculados ás entidades do terceiro sector na procura do establecemento dun diálogo e o correspondente debate.

A USC está a consolidar o proceso de implementación da metodoloxía da aprendizaxe-servizo nos estudos superiores a través tanto da investigación, liderada polo grupo de investigación ESCULCA, como pola propia acción mediante o desenvolvemento, por exemplo, da cuarta convocatoria de Proxectos de Innovación Educativa en Aprendizaxe-Servizo, coordinada dende a Vicerreitoría de Organización Académica a través do Centro de Tecnoloxías para a Aprendizaxe. Neste contexto o Servizo de Participación e Integración Universitaria encárgase de establecer as pontes entre os axentes do terceiro sector da contorna dos campus de Santiago e Lugo e os grupos de docentes implicados no desenvolvemento de proxectos de ApS nos diferentes graos ofertado pola nosa universidade.

Programa
A inauguración da xornada celebrouse na Facultade de Filosofía coa intervención das vicerreitoras de Organización Académica, Celia Besteiro, e de Comunicación, Cultura e Servizos, Mar Lorenzo, e do decano do centro, Marcelino Agís. Deseguido, a orientadora da Área de Orientación Laboral e Emprego da USC Celia Conde Pumpido pronunciou unha conferencia sobre a relación entre aprendizaxe-servizo e empregabilidade. Entre as 12.00 e as 14.00 horas están previstas dúas mesas para presentar distintas experiencias nos ámbitos da Educación e no das Ciencias Sociais.

Pola tarde, o programa comeza ás 16.00 horas coa presentación de pósteres e continuará cun panel de experiencias das entidades sociais para analizar o papel do alumnado dos proxectos de ApS nas entidades do terceiro sector. Intervirán representantes de Farmamundi, Solidariedade Internacional-Galicia, a Asociación Recreativa Cultural ‘Os Tilos’ e Alume. A xornada completarase con outras dúas mesas nas que se compartirán as experiencias desenvolvidas en Educación e Enxeñaría e en Ciencias da Saúde.