Saltar ao contido principal
Xornal

Un estudo zooarqueolóxico e tafonómico dos restos de fauna da Cova Eirós realizado na USC achega luz sobre a Prehistoria galega

A tese realizada por Irene Valverde e co dirixida por Ramón Fábregas permite coñecer as estratexias de subsistencia dos Humanos Anatomicamente Modernos e dos Neandertais

Actualizada: 24-06-2019 16:56 . INVESTIGACIÓN
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Restos de fauna atopados en Cova Eirós

A USC achega luz ao coñecemento dos períodos máis antigos da prehistoria en Galicia cun estudo zooarqueolóxico e tafonómico dos restos de fauna achados na Cova Eirós (Triacastela, Lugo), como é o recollido na tese de doutoramento que vén de presentar Irene Valverde Tejedor na Facultade de Xoegrafía e Historia de Compostela baixo o título ‘Patróns de aproveitametno faunístico e estratexias de subsistencia durante a Transición Paleolítico medio-superior no NON Peninsular’.

 

A investigación de doutoramento desenvolvida en réxime de co tutela internacional entre as universidades de Santiago de Compostela e de Ferrara, en Italia, baixo a co dirección dos profesores Ramón Fábregas Valcarce e Ursula Thun Hohenstein, e defendida en castelán e italiano por Irene Valverde Tejedor, constitúe unha nova achega do importante xacemento de Cova Eirós ao coñecemento da prehistoria galega máis antiga.

 

A tese presentada por Valverde Tejedor baséase no estudo zooarqueolóxico e tafonómico de todos os restos de fauna achados en Cova Eirós (Triacastela, Lugo) ao longo dunha secuencia de ocupacións que se data entre fai 46.000 e 30.000 anos aproximadamente. Á importancia destas pescudas cómpre sumar asemade que feito de que o de Cova Eirós é un dos poucos exemplos de xacementos paleolíticos de Galicia nos que se conservaron restos orgánicos.

 

O estudo dos restos de fauna achados neste xacemento permitiu coñecer as estratexias de subsistencia dos Humanos Anatomicamente Modernos e dos Neandertales, ademais de posibilitar a reconstrución dos distintos escenarios de ocupación e utilización da cova, tanto por parte dos homínidos como dos carnívoros. Asemade, esta investigación da USC permite deixar testemuñado o protagonismo do Oso das Cavernas como especie animal máis representada ao longo de toda a secuencia arqueolóxica, posto que este tipo de osos ocuparon a cova para hibernar nos momentos de abandono humano.

 

As conclusións achegadas nesta investigación da USC constitúen un importante avance para a investigación da Prehistoria galega, ao tratarse do primeiro estudo baseado nos aspectos socio-económicos e na xestión do territorio por parte de dúas especies de homínidos tan diferentes como os Neandertais e os Homo sapiens.

 

Tribunal de tese e cualificación

O profesor de Ecoloxía Prehistórica Marco Peresani, gran experto mundial no estudo da transición do Paleolítico medio ao superior en Europa, presidiu o tribunal encargado de avaliar a tese de doutoramento realizada e presentada na USC por Valverde Tejedor. O profesor de Prehistoria da Universidade de León e experto en Zooarqueoloxía do NON peninsular Carlos Fernández, e Antón Rodríguez Casal, profesor Titular de Prehistoria da USC, que actuou como secretario, completaron a composición do tribunal.