Saltar ao contido principal
Xornal

O e-book Na procura da noite. Fotografando o ceo nocturno, premio nacional de edición universitaria

Foi elixido Mellor edición dixital e multimedia nos XXII Premios Nacionais de Edición Universitaria

Actualizada: 25-06-2019 10:38
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Captura da imaxe de portada do volume premiado

Un xurado independente e de recoñecido prestixio acaba de elixir entre un total de 192 títulos candidatados, os mellores libros editados en 2018 polas universidades españolas organizados en 12 modalidades, e entre os que a USC acaba de colectar o de Mellor edición dixital e multimedia. Así, a Universidade compostelá foi recoñecida nestes XXII Premios Nacionais de Edicación Universitaria polo e-book en formato pdf editado polo Servizo de Publicacións Na procura da noite. Fotografando o ceo nocturno. O  xurado que outorgou o recoñecemento conformábano Ernesto Pérez Zúñiga, xefe do departamento de actividades culturais do Instituto Cervantes; Manuel Rodríguez Rivero, crítico literario; Carmen Rodríguez Santos, colaboradora do suplemento ABC Cultural; Nuria Azancot, xefa de redacción de El Cultural de El Mundo; Iker Seisdedos, redactor xefe de Cultura e Babelia de El País; e Pampa García Molina, coordinadora e redactora xefa do Servizo de Información e Noticias Científicas (SINC) do CSIC. O xurado valorou o “soporte dixital axeitado á difusión dos contidos visuais desta obra, na que os investigadores realizan unha aproximación ao tema, sen deixar de lado a beleza das imaxes”.

Na procura da noite. Fotografando o ceo nocturno, que competía con obras dixitais e multimedia das Universidades de Sevilla, Autónoma de Madrid, Huelva, Cantabria e UNED, reúne 94 imaxes dos fotógrafos Óscar Blanco, Ana García, Daniel Llamas, Daniel Lois, Alfredo Madrigal, Pablo M. Alemparte, Fernando Rey, Ángel R. Arós e Alba Rodríguez. En conxunto móstrase preto dun cento de instantáneas do ceo nocturno da man “dun grupo de soñadores que, sendo sensibles ao instinto ancestral de mirarmos cara ao ceo, se lanzaron á procura da noite a rescatar ese tesouro apagado polo malgasto de luz artificial”, tal e como apuntan no limiar da obra Salvador Bará Viñas e Jorge Mira Pérez, profesores do Departamento de Física Aplicada da USC, promotores e coordinadores da obra.

Para o director do Servizo de Publicacións, Juan L. Blanco Valdés, “o galardón é o recoñecemento a un labor de equipo que tivo unha ‘cociña’ moi complexa, tanto dende o punto de vista da xestión dos dereitos e condicións da cesión entre nove autores como da propia idea do libro, deseño, elaboración técnica, depuración de erros… ata un produto final que contentou a todas as partes, promotores, autores e editores”. Como engade “trátase do tipo de obra imposible de executar sen o punto de entusiasmo indispensable para compensar as dificultades. Ao cabo, o premio é un recoñecemento global á Universidade, en canto institución coa capacidade de interconectar tantas sensibilidades”.