Saltar ao contido principal
Xornal

O proxecto ‘Descarboniza! Que non é pouco...’ botará este sábado o peche ao programa de actividades deste curso

No barrio de San Pedro organizará unha sesión informativa para familias sobre o impacto do cambio climático

Actualizada: 27-06-2019 11:25
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Imaxe de arquivo dun dos obradoiros celebrados este ano

O proxecto ‘Descarboniza! Que non é pouco...’ botará o peche ao programa de actividades previsto para este curso o sábado 29 cunha sesión informativa dentro do proxecto ‘Espazo ciencia’ que comezará ás 17.00 horas na praza 8 de marzo. É unha actividade destinada principalmente a familias na que se analizará como afecta o cambio climático e que pode facer a cidadanía para enfrontalo colectivamente.

Durante o presente curso, o proxecto ‘Descarboniza! Que non é pouco…’ contou co apoio da Fundación Biodiversidade, do Ministerio para a Transición Ecolóxica, dentro da liña de axudas destinadas a proxectos de adaptación ao cambio climático. Dende o pasado mes de xaneiro, nun traballo desenvolvido en paralelo coa Fundación Cristina Enea do concello de San Sebastián/Donostia, traballouse con oito grupos en Santiago (Vite, Santa Marta, A Rocha, Sar, Lavacolla, Busto e Bornais -2-) e 3 en San Sebastián (Altza, Egia e Ategorrieta). A través de varias sesións de traballo, os grupos, compostos fundamentalmente por mulleres da terceira idade, analizaron as causas e consecuencias do cambio climático e tamén que podían facer elas para enfrontalo.

Destas sesións xurdiron varias actividades abertas aos seus respectivos barrios: obradoiros de elaboración de pan, cosmética natural, plantas medicinais ou a elaboración dun mural como o de A Rocha, no que destacar a importancia da comunidade. As conclusións do traballo desenvolvido neste curso serán trasladadas ás distintas administracións para valorar a súa continuidade e extensión a outros concellos. Así mesmo, o Grupo de Investigación en Pedagoxía Social e Educación Ambiental (SEPA) da USC, quen deseñou o proxecto e foi o encargado da coordinación pedagóxica do mesmo, presentará nas próximas semanas as conclusións do proceso de investigación levado a cabo en paralelo ás actividades.