Saltar ao contido principal
Xornal

O programa de conciliación Verán CampUSC afronta a súa segunda quenda

Unicamente quedan prazas dispoñibles na quenda do 22 ao 31 de xullo

Actualizada: 04-07-2019 13:05
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Detalle dunha das actividades desenvolvidas nestes primeiros días. Foto: Fundación USC Deportiva

O programa de conciliación Verán CampUSC afronta a súa segunda semana de funcionamento dirixido a rapaces e rapazas de entre 3 e 13 anos de idade. Na súa segunda quenda, que se estenderá ata o 12 de xullo, o programa combina xogos e deportes tradicionais, coma o baloncesto, o atletismo ou voleibol, con outros menos habituais, coma o kung fu, xogos con paracaídas, quidditch ou jugger. Nesta ocasión serán os rapaces de mediana idade os que gocen da actividade en inglés, con saídas á piscina Fontes do Sar e a Catoira.

O Verán CampUSC comezou o pasado 24 de xuño con 100 rapaces e rapazas de entre 3 e 13 anos de idade. Nesa primeira quenda, ademais de facer numerosos xogos e actividades deportivas como kárate, colpbol, zumba, fortnite ou autodefensa, fixeron tamén dúas saídas: unha á piscina Fontes do Sar e outra ao Monte do Gozo. Os máis pequenos tamén tiveron unha pequena representación teatral en colaboración con Kids & Us. Nestes momentos están xa todas as quendas cubertas agás a cuarta, do 22 ao 31 de xullo. O Verán CampUSC rematará o 10 de setembro.

Veran CampUSC
Ao longo do programa amósaselles aos participantes as bases dunha importante cantidade de xogos e deportes atendendo ás particularidades das súas idades e desenvolvemento psíquico-físico. Os promotores de Verán CampUSC sosteñen que a práctica de actividades físico-deportivas resulta beneficiosa, non só no plano da saúde, senón tamén como vía para inculcar dun xeito lúdico os valores de disciplina, esforzo, perspectiva de xénero, dedicación e respecto ás normas que, sen dúbida, resultarán de utilidade para a vida cotiá.

Entre outras, os rapaces e rapazas realizarán deportes de raqueta e de loita, psicomotricidade, deportes colectivos, sendeirismo, acrosport, xogos predeportivos e populares, entre outros. Dentro das actividades de ocio e tempo libre inclúense diferentes obradoiros con diversas técnicas e materiais (modelaxe, pintura, recortables ou papiroflexia), cancións, xogos cooperativos, actividades en favor da igualdade e visitas a lugares significativos da cidade e da súa contorna.

Esta é unha actividade que organiza a Fundación USC Deportiva coa colaboración da Oficina de Igualdade de Xénero e do Servizo de Deportes da USC e da Concellaría de Igualdade de Santiago.


Outras imaxes


O programa contempla múltiples actividades, tanto nas instalacións da USC como no exterior. Foto: Fundación USC Deportiva