Saltar ao contido principal
Xornal

A EPS de Enxeñaría da USC impulsa a creación da maior rede de observación de formación de madeira en carballos de Galicia

A tese de Guillermo Guada Prada, dirixida por Ignacio García, estuda a formación de madeira e a fenoloxía das follas en bosques das cuncas dos ríos Eume, Sor e Lor

Actualizada: 15-07-2019 14:06 . INVESTIGACIÓN
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Guillermo Guada, na presentación da súa tese de doutoramento no edificio Cactus

Investigadores da Escola Politécnica Superior de Enxeñaría do campus de Lugo da USC ligados ao grupo Biodiversidade e Botánica Aplicada (Bioaplic) do Departamento de Botánica da USC impulsan a creación da maior rede de observación de formación dos procesos de formación de madeira en Quercus robur (carballo) de Galicia ao abeiro da liña de investigación aberta xa hai uns anos para tratar de comprender o efecto do cambio climático sobre os carballos en Galicia, ademais de para coñecer cal sería o seu comportamento no futuro.

 

A tese de dutoramento que vén de presentar este luns no edificio Cactus do campus de Lugo o enxeñeiro de Montes Guillermo Guada Prada baixo o título ‘Spatio-temporal study of wood formation of Quercus robur L. and Q. pyrenaica Willd. in the Northwest of the Iberian Peninsula’ achega os últimos resultados desta liña de investigación iniciada polo grupo Bioaplic da USC. Esta investigación, dirixida polo profesor da USC Ignacio García González, constitúe un estudo no que se aborda o efecto do clima sobre a formación de madeira, a través da análise da dinámica de formación de madeira (xiloxénese), complementado con análises retrospectivas dos aneis de crecemento (dendrocronoloxía). A aplicación destas técnicas, segundo precisa Guada Prada, resulta fundamental para establecer unha correcta interpretación das relacións causa-efecto nas respostas que as árbores presentan ao clima.

 

Os resultados recollidos nesta tese de doutoramento son froito dun labor de seguimento do proceso de formación de madeira e a fenoloxía das follas desenvolvido por Guillermo Guada Prada durante dous anos de crecemento en 14 localidades de bosques naturais de carballos, con nove localidades para Quercus robur (carballo) nas concas dos ríos Sor e Eume, e cinco para Q. pyrenaica (rebolo) ao longo do río Lor.

 

Daquela, este estudo constitúe a maior rede de observación de formación de madeira en carballos até o momento. De feito, esta investigación permitiu analizar as relacións entre o clima e a dinámica de formación de madeira nos 14 sitios obxecto de estudo, ademais de establecer a sincronización entre crecemento de madeira e desenvolvemento da folla, ao tempo que se cuantificou o contido en auga dos órganos da copa (ramas, xemas, follas) para minimizar a subxectividade das observacións fenolóxicas.

 

Unha vez recollidos e analizados estes datos logo dun dilatado proceso de observación, os a información obtida empregouse para a interpretación do estudo dendrocronolóxico da anchura e a anatomía dos aneis de crecemento, un traballo posterior que se aplicou en catro localidades das 14 seleccionadas inicialmente.

 

Tribunal de tese e cualificación

O tribunal encargado de avaliar a tese de dutoramento presentada por Guillermo Guada Prada estivo presidido por Jesús Julio Camarero Martínez, do Instituto Pirenaico de Ecoloxía (CSIC, Zaragoza). María Cristina Amaral Penas Nabais dos Santos, da Universidade de Coimbra, e o profesor do Departamento de Botánica da USC Ramón Alberto Díaz Varela, que actuou como secretario, completaron a composición dun tribunal que outorgou a máxima cualificación académica á investigación de doutoramento presentada polo enxeñeiro de Montes Guillermo Guada Prada.


Outras imaxes