Saltar ao contido principal
Xornal

O proxecto ‘XuvenCiencia. Fago, logo aprendo’, dos máis valorados na última convocatoria de axudas da Fecyt á cultura científica

As propostas da USC ‘Efervescencia 500’ e ‘Stat Wars. O imperio dos datos’, tamén acadaron financiación da Fundación Española para a Ciencia e a Tecnoloxía

Actualizada: 19-07-2019 14:36
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Sesión do programa XuvenCiencia para profesorado

O proxecto ‘XuvenCiencia. Fago, logo aprendo’, promovido polo grupo de innovación docente XuvenCiencia do campus de Lugo, coordinado pola profesora Mercedes Novo Rodríguez, é unha das tres iniciativas da USC que veñen de acadar financiamento na última convocatoria de axudas para o fomento da cultura científica, tecnolóxica e da innovación, convocadas pola Fundación Española para a Ciencia e a Tecnoloxía (Fecyt). A resolución provisional das axudas expedidas pola Fecyt para os anos 2019-20 tamén contempla achegas económicas para outras iniciativas impulsadas desde a USC, tales como son ‘Efervescencia 500’ e ‘Stat Wars. O imperio dos datos’.

 

O proxecto ‘XuvenCiencia. Fago, logo aprendo’, que contara con respaldo da Fecyt nas edicións de 2017 e 2015, concorreu a esta convocatoria de axudas xunto con outras 254 candidaturas promovidas por entidades privadas e pública de toda España na liña de Creatividade e vocacións científicas, na que acadou a cuarta puntuación máis alta, logo de acadar 96 puntos dun máximo de cen.

 

A profesora Mercedes Novo e coordinadora do grupo XuvenCiencia, no que tamén teñen unha implicación activa profesorado das facultades de Ciencias, Veterinaria e da Escola Politécnica Superior de Enxeñaría do campus de Lugo ligados aos departamentos de Química Física, Patoloxía Animal, Anatomía Patolóxica, Xenética, Enxeñaría Agroforestal ou Producción Vexetal e Proxectos de Enxeñaría, recoñeceu sentirse “moi satisfeita” pola alta valoración feita pola Fecyt respecto deste proxecto.

 

O obxectivo de ‘XuvenCiencia. Fago, logo aprendo’, unha iniciativa, que se estrutura en dúas accións estreitamente ligadas, como o son as xornadas ‘XuvenCiencia para profesorado’ e o programa ‘ XuvenCiencia na aula’, pasa por achegar a metodoloxía científica e a práctica investigadora ao alumnado de secundaria e bacharelato a través de kits de experimentación, introducindo aos mozos no método científico e promovendo a súa capacidade de observación, de resolución de problemas e a súa creatividade. O proceso de investigación desenvólvese na aula baixo a titoría do profesorado de ensino medio previamente formado, dunha forma flexible, personalizada, e contando en todo momento co apoio do profesorado universitario.

 

As principais novidades incluídas nesta nova edición do proxecto ‘XuvenCiencia. Fago, logo aprendo’, responden á inclusión de sesións de formación específica sobre o método científico e o deseño de experimentos para o profesorado de ensino secundario, durante as que se traballarán as distintas fases do traballo científico desde a toma de datos e o procesamento e presentación dos mesmos ata a discusión de resultados e a súa publicación en forma de artigo científico ou a través das novas tecnoloxías (blogs, aulas Facebook)…

 

A próxima edición de ‘Xuvenciencia. Fago, logo aprendo’ contempla asemade a actualización dos kits existentes (Vitroplant, Animal CSI, Photonics Explorer e Aqualab) con novas actividades interdisciplinares e adaptadas ao currículo escolar e prácticas ligadas ás probas da EBAU. A estes kits xa existentes engádense dous novos, a través dos que se busca achegar a investigación ao mundo real, coñecendo os fundamentos básicos de certas técnicas de amplo uso e relevancia como a PCR (kit DNA-MEAT) ou a fotometría (kit de Análise Fotométrico).

 

Novos kits

O kit DNA-MEAT ‘Ensaio molecular de trazabilidade animal’, no que está implicado profesorado do Departamento de Xenética da USC, pretende achegar as técnicas básicas rutinarias dun laboratorio de bioloxía molecular a estudantes preuniversitarios. O obxecto desta nova ferramenta é a identificación da composición de produtos cárnicos manufacturados coa finalidade de poder detectar posibles fraudes alimentarios. Este novo kit permitirá crear unha ferramenta molecular que permita a identificación da presenza de dúas das principais carnes consumidas en Galicia: tenreira e porco. Dado que os centros educativos non adoitan dispor de termocicladores, a PCR realizarase de forma manual, utilizando baños a diferentes temperaturas e cronómetros para o control dos tempos.

 

O novo kit de Análise Fotométrico, en cuxo deseño participa profesorado das áreas de Química Física, Bioquímica, Enxeñaría Agroforestal e Expresión Gráfica, ten como obxectivo familiarizar ao estudantado coas análises química e bioquímica, a través dunha ferramenta de amplo uso como é o fotómetro, pero aplicándoa á determinación analítica de da proteína que contén un elemento.

 

Este kit consta de dúas partes, un fotómetro básico baseado no microcontrolador Arduino e a impresión 3D, e será deseñado e construído polos responsables do kit de maneira que permita a realización de medidas de absorbencia coa precisión adecuada pero que tamén sirva para mostrar os fundamentos da fotometría, e os reactivos e material necesarios para a valoración cuantitativa da proteína presente nun alimento utilizando o método de Lowry.