Saltar ao contido principal
Xornal

Unha tese da USC analiza o tratamento da crise económica nos medios de comunicación

O autor da investigación é Raul Rios e os directores, Edelmiro López Iglesias e Luís Álvarez Pousa

Actualizada: 24-07-2019 09:50 . INVESTIGACIÓN
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Que tipo de discurso reproduciron os medios de comunicación no seu tratamento da crise de 2008? Esta é a pregunta da que parte Raul Rios Rodríguez na súa tese ‘O tratamento mediático da crise económica: Umha legitimaçom da resposta política neoliberal? Análise de El País e La Voz de Galicia (2008-2015)’, dirixida polos profesores Edelmiro López Iglesias e Luís Álvarez Pousa e cualificada con sobresaliente cum laude. De maneira máis concreta, o autor analiza se os medios actuaron como axentes lexitimadores das políticas de austeridade e as reformas estruturais postas en marcha no Estado español a partir de maio de 2010 como resposta á crise.

Para analizar o discurso dos dous xornais, Raul Ríos tomou como base a teoría do framing e realizou unha Análise de Contidos tanto cualitativa como cuantitativa dunha mostra composta por máis de 2.000 textos xornalísticos. A principal conclusión que extrae dos resultados da análise é que os medios estudados lexitimaron as políticas de tipo neoliberal ao presentalas como se fosen a única alternativa existente; non necesariamente tratándoas como positivas ou desexábeis.

De feito, segundo o autor, unha parte significativa dos textos xornalísticos estudados mantiveron un ton relativamente crítico ao tratar as consecuencias deste tipo de políticas, pero sen dedicar espazo a tratar outras posíbeis opcións de política económica.

Raul Rios (A Coruña, 1990) é licenciado en Xornalismo pola USC e conta cun máster en Desenvolvemento Económico e Innovación pola mesma universidade.