Saltar ao contido principal
Xornal

A EPS de Enxeñaría achega ferramentas acaídas para optimizar a xestión sustentable de cultivos leñosos de curta rotación

A tese da enxeñeira de Montes Nerea de Oliveira Rodríguez, dirixida por César Pérez, Hortensia Sixto e Roque Rodríguez, contribúe a crear un mercado de biomasa estable

Actualizada: 31-07-2019 12:09
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Nerea de Oliveira Rodríguez, terceira pola dereita, cos directores e membros do tribunal da tese, na EPS de Enxeñaría de Lugo

A tese de doutoramento que vén de presentar a enxeñeira de Montes e investigadora do Instituto Nacional de Investigación e Tecnoloxía Agraria e Alimentaria Nerea de Oliveira Rodríguez na EPS de Enxeñaría do campus de Lugo da USC baixo o título ‘Biometría de cultivos leñosos de curta rotación en condicións mediterráneas’ achega novas ferramentas acaídas para a mellora da xestión sustentable deste tipo de plantacións e avanza cara a creación dun mercado de biomasa máis estable.

 

A investigación de doutoramento desenvolvida por esta colaboradora do grupo de investigación Unidade de Xestión Ambiental e Forestal Sustentable (UXFS) da USC baixo a dirección de César Pérez Cruzado, Hortensia Sixto e Roque Rodríguez Soalleiro, achega numerosas ferramentas cuantitativas para a xestión sustentable destes cultivos, considerando diferentes clons de especies e híbridos de chopo así como da especie Robinia pseudoacacia.

 

O desenvolvemento dunha bioeconomía circular baseada no uso sustentable de recursos biolóxicos parece ser unha das mellores vías para tratar de dar resposta aos desafíos do cambio climático. O emprego da biomasa como un recurso natural renovable e fonte de materia prima para obtención de bioprodutos ou bioenerxía resulta susceptible de xestionar a través de cultivos de curta rotación, que poden ser especialmente necesarios en áreas de pouca dispoñibilidade de biomasa.

 

A temática desta investigación de doutoramento céntrase na avaliación da biometría destes cultivos a diferentes escalas, desde árbores individuais á plantación, tratando diferentes sistemas de xestión e numerosos materiais xenéticos. O traballo baséase nunha rede de parcelas dispoñible en toda España.

 

A autora desta tese, que se encadra no proxecto RTA ‘Biomasa para a bioeconomía, Producindo, Cuantificando e Valorando Cultivos Forestais’, no que colaboran o grupo UXFS da USC e o CIFOR-INIA en Madrid, achega no seu estudo estimacións de biomasa de raíces cuxo carbono quedará incorporado no chan, avaliacións de deseños mixtos de álamo branco e especies leguminosas fixadoras de nitróxeno, diagramas de xestión da densidade dos cultivos, modelos de estimación de biomasa dependentes do clon e melloras na metodoloxía de toma de mostras e intensidade recomendable de mostraxe para producir estimacións precisas da biomasa producida.

 

A temática abordada nesta investigación encádrase tamén nas áreas sobre as que traballa a agrupación estratéxica de investigación BioReDes do Campus Terra da USC, ao tempo que pon de relevo o impacto social e económico derivado das plantacións forestais. De feito, os cultivos forestais en curta rotación teñen un marcado impacto social e fomentan o emprego en zonas rurais. Os diferentes servizos ecosistémicos asociados a este tipo de plantacións contribúen á mellora ambiental pero tamén poden chegar a xerar un valor económico asociado.

 

Nerea de Oliveira Rodríguez achega neste senso novos recursos de fácil aplicación e que facilitan a toma de decisións por parte dos xestores das plantacións en aras a mellorar a súa viabilidade económica, co que, en definitiva, se contribúe á progresiva creación dun mercado de biomasa máis estable. Alén desta investigación e unha vez rematada a súa tese, a nova doutora continuará a traballar dentro desta liña cun contrato postdoutoral no CIFOR-INIA e en colaboración co grupo UXFS da USC no proxecto RTA ‘Optimización e modelización da produción sustentable de biomasa lignocelulosica para a obtención de bioprodutos baixo escenarios de cambio climático (LIGBIO)’.