Saltar ao contido principal
Xornal

Investigadores de vinte e tres países danse cita en Medicina para debater os últimos avances no eido das ciclodextrinas

O programa constou de dez sesións nas que se combinaron nove conferencias plenarias e vinte e seis comunicacións orais

Actualizada: 04-10-2019 13:27
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Acto inaugural do Congreso

A VI Conferencia Europea sobre Ciclodextrinas concentrou esta semana na Facultade de Medicina da USC a preto de douscentos investigadores, procedentes de vinte e tres países, non só de Europa senón tamén de América, Africa e Asia para debater en torno a estas “fascinantes moléculas”, en palabras dos organizadores.

 

Este congreso serviu para que os participantes puidesen debater os últimos avances en campos moi amplos nos que as ciclodextrinas funcionan como ferramentas únicas. Trátase dun punto de encontro multidisciplinar de sectores da academia e a industria dedicados á preparación de ciclodextrinas e os seus derivados, á modelización e á caracterización das súas propiedades, e ao desenvolvemento de novas aplicacións en ámbitos tan diversos como a formulación de medicamentos, a terapia xénica, o medicamento rexenerativo, a tecnoloxía de alimentos, a química analítica, a remediación ambiental e a agricultura, entre outros.

 

A selección da cidade de Santiago de Compostela como sede deste congreso constitúe un recoñecemento ás achegas que os investigadores da USC veñen facendo desde hai anos ao avance da ciencia e a tecnoloxía nesta materia. O programa constou de dez sesións nas que se combinaron nove conferencias plenarias e vinte e seis comunicacións orais. No foro tamén houbo espazo para que os novos investigadores presenten os seus traballos como comunicacións breves e pósters.

 

O vicerreitor de Investigación e Innovación, Vicente Pérez Muñuzuri, presidiu o acto inaugural do congreso xunto ao presidente da Sociedade Europea de Ciclodextrinas, Kim L. Larsen, e os profesores da Facultade de Farmacia Carmen Álvarez Lorenzo, Ángel Concheiro Nine e Francisco Otero Espinar.