Saltar ao contido principal
Xornal

O alumnado, no centro da toma de decisións

Representantes de estudantes reuníronse co vicerreitor de Estudantes e o xerente para coñecer os plans de humanización do campus, o borrador de Estatuto do Estudantado ou futuros proxectos para o Servizo Universitario de Residencias

Actualizada: 04-10-2019 14:15
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Os plans de humanización do campus foi un dos tema tratados. Foto: Santi Alvite

A humanización do campus, o impulso da participación do estudantado na toma de decisións e o fortalecemento do Servizo Universitario de Residencias como elemento de igualdade de oportunidades no acceso ao ensino universitario foron os tres temas dun encontro este venres entre o vicerreitor de Estudantes e Internacionalización, Víctor Arce; o xerente da USC, Javier Ferreira; e unha representación de asociacións de estudantes da Universidade compostelá. Conscientes de que “o alumnado é unha peza central no desenvolvemento da misión da Universidade”, o actual equipo de goberno da USC está a definir unha serie de accións que permitan fortalecer a participación deste colectivo na vida activa dos campus, propiciando unha maior calidade da etapa universitaria e favorecendo unha maior implicación na toma de decisións.

Neste senso, o vicerreitor e o xerente trasladáronlle aos representantes estudantís os proxectos nos que a USC traballa dende hai máis dun ano para poñer en valor os espazos nos que se asenta a institución compostelá. Trátase de “facer unha aposta decidida por integrar a cidade e o campus como elementos naturais dun mesmo ecosistema”, ao tempo que dar pasos cara un cambio de mentalidade dirixido a “humanizar esta parte da cidade e achegar medidas que desenvolvan a conciencia e o rol medio ambiental da institución universitaria en sentido global”. Nese senso deron conta das propostas dos itinerarios que conformarán as sendas seguras para o acceso aos centros en horarios de menor afluencia así como doutras actuacións chamadas a “mellorar a calidade da vida nestes espazos da cidade”. Implantar a sinalización destes itinerarios, optimizar a iluminación ou mudar hábitos de mobilidade nesta zona da cidade son algunhas das propostas presentadas e para as que invocaron a necesaria colaboración da concello compostelán, xunto con outras que buscan conectar campus norte e sur en base a alternativas sostibles.

Servizo de Residencias
O vicerreitor Victor Arce avanzou na xuntanza a vontade de reforzar o Servizo Universitario de Residencias (SUR) como garante da igualdade de oportunidades. Na procura de achegar propostas fronte a situacións de especulación inmobiliaria, o vicerreitor adiantou que a USC busca deseñar unha tarifa cero para o acceso ao Servizo de persoas con especiais necesidades económicas así como revisar o sistema de progresividade para asegurar que as persoas coas rendas máis baixas accedan ás cotas de subvención máis altas.

Tamén adiantou que se está a estudar a posibilidade de ofertar as prazas do SUR durante o verán, en período de baixo ou nula ocupación, ao resto da comunidade universitaria do estado. Esta medida permitiría captar recursos para o sostemento dunha infraestrutura singular en Galicia e que carece de financiamento público para o seu mantemento.

Estatuto do estudantado
O estatuto do Estudantado, actualmente en fase de borrador para o seu debate cos distintos grupos de interese, foi outra das cuestións abordadas. Como se explicou, o texto está chamado a reforzar a implicación do alumnado na toma de decisións da USC e, por tanto, “na vida da institución”. O texto recollerá entre as súas principais novidade a constitución do Consello de Estudantes, unha “ferramenta esencial para a representatividade deste colectivo, tanto no seo da USC como para ámbitos estatais de xestión deste colectivo universitario”.


Outras imaxes


Víctor Arce e Javier Ferreira, nun momento do encontro con representantes de estudantes. Foto: Santi Alvite